2024-nji ýyl - Magtymguly Pyragy ýyly
Bilşimiz ýaly, Türkiýäniň Bursa şäherinde geçirilen TÜRKSOÝ guramasynyň medeniýet ministrleriniň hemişelik geňeşiniň 39-njy mejlisinde TÜRKSOÝ tarapyndan 2024-nji ýyl - Magtymguly Pyragy ýyly diýlip yglan edildi.
Geljek ýylda türkmen halkynyň beýik şahyry Magtymguly Pyragynyň doglan gününiň 300 ýyllygy bellener. Türkmenistan bu şanly senäni giňden hem-de halkara derejesinde belläp geçmek üçin taýýarlyk işlerini ýokary derejede görýär.
2024-nji ýylda bu şanly sene mynasybetli birnäçe medeni çäreleri amala aşyrmak meýilleşdirilýär.
Birnäçe halkara guramalar bilen hyzmatdaşlykda akyldar şahyryň edebi mirasyny dünýä derejesinde öwrenmegi hem-de wagyz etmegi ýola goýmak maksat edinilýär. Şu maksatlar bilen 2024-nji ýylda Aşgabat şäherinde Halkara ylmy maslahatyny geçirmek meýilleşdirilýär. Onuň halkara guramalary bilen hyzmatdaşlykda geçirilmegi şahyr-filosofyň edebi mirasyny dünýä derejesinde öwrenmäge we ýaýratmaga täze itergi berer.
Ýeri gelende ýatlasak, 2014-nji ýylda Magtymguly Pyragynyň doglan gününiň 290 ýyllygy dabaraly ýagdaýda bellenip geçilipdi.
Toýlyýew Toýly,
Döwletmämmet Azady adyndaky Türkmen
milli dünýä dilleri institutynyñ Iňlis dili we
edebiýaty fakultetiniň 4-nji ýyl talyby.
