Bilim-ösüşleriň binýady
Berkarar döwletiň täze eýýamynyň Galkynyşy döwründe Hormatly Prezidentimiziň bilim ulgamynda amala aşyrýan düýpli özgertmelerini maksadalaýyk durmuşa geçirmek, hil taýdan täze derejä çykarmak, ösüp gelýän ýaş nesle döwrebap bilim-terbiýe bermek, çagalaryň innowasion tehnologiýalardan netijeli peýdalanmak başarnyklaryny we döredijilik ukyplaryny ösdürmek, olara hünär öwretmek babatda durmuşa geçirilmeli işleri maslahatlaşmak, 2024-2025-nji okuw ýylynyň jemini jemlemek hem-de täze 2025-2026-njy okuw ýylynda öňde durýan wezipeleri kesgitlemek maksady bilen, 16-njy awgustynda Aşgabat şäher Baş bilim müdirliginiň mejlisler zalynda «Halkara parahatçylyk we ynanyşmak» diýen şygar bilen öňdebaryjy pedagogik işgärleriň maslahaty geçirildi.
Maslahata Aşgabat şäher Baş bilim müdirliginiň ýolbaşçylary, umumybilim we mekdebe çenli çagalar edaralarynyň müdirleri, öňdebaryjy pedagogik işgärler, Halk maslahatynyň agzalary, jemgyýetçilik guramalarynyň wekilleri gatnaşdylar.
Öňdebaryjy pedagogik işgärleriniň maslahatynyň çäginde Aşgabat şäheriniň Çagalar we ýetginjekler köşgüniň çagalarynyň aýdym-sazly çykyşlary, bilim ulgamynda gazanylan üstünlikleri wasp edýän sergiler gurnaldy.
Aşgabat şäher Baş bilim müdirliginiň başlygy Ç.Annaorazowyň 2024-2025-nji okuw ýylynyň jemleri, täze okuw ýylynda öňde durýan wezipeler barada bilim edaralarynda okuw-terbiýeçilik, usuly işleriň alnyp barlyşy boýunça seljerme çykyşy diňlenildi.
Maslahatda Myrat Garryýew adyndaky Lukmançylyk uniwersitetiniň Stomatologiýa okuw-önümçilik merkeziniň lukmany, ylymlaryň kandidaty, Türkmenistanyň Il ýaşulysy, Aşgabat şäher halk Maslahatynyň başlygy Gurbannazar Ataýewiň, Türkmenistanyň Ylym we bilim işgärleriniň Kärdeşler arkalaşygynyň Geňeşiniň başlygy Hanaly Baýramowyň, Türkmenistanyň Magtymguly adyndaky Ýaşlar guramasynyň Bagtyýarlyk etrabynyň başlygy Rüstem Mämmedowyň hem-de halypa pedagogik işgärler Hormatly Prezidentimiziň, Türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň bilim ulgamyny kämilleşdirmek, ýaş nesle berilýän bilimiň ýokary hilini üpjün etmek barada pedagogik işgärleriň öňünde goýan wezipelerini durmuşa geçirmek, okatmagyň usulyýetini kämilleşdirmek, öňdebaryjy pedagogik işgärleriň tejribelerini ýaýratmak boýunça alnyp barylýan işler barada çykyş etdiler.
Aşgabat şäher Baş bilim müdirligi, Ylym, bilim işgärleriniň kärdeşler arkalaşygynyň Aşgabat şäherindäki ilkinji guramalarynyň başlyklarynyň geňeşi tarapyndan döredijilikli zähmet çeken, hünärine ussat pedagogik işgärlere Hormat hatlar we sowgatlar gowşuryldy.
Ýurdumyzyň bilim ulgamyny ösdürmek barada edýän yzygiderli aladalary üçin Hormatly Prezidentimize we türkmen halkynyň Milli Lideri Gahryman Arkadagymyza tüýs ýürekden sag bolsun aýdýarys.
Hormatly Prezidentimiziň we türkmen halkynyň Milli Lideri Gahryman Arkadagymyzyň janlarynyň sag bolmagyny, il-ýurt, umumadamzat bähbitli işleriniň rowaç bolmagyny tüýs ýürekden arzuw edýäris!
Aşgabat şäher Baş bilim müdirliginiň
Umumy orta bilim bölüminiň başlygy
Rejepdurdy Şahalyýew
