Žurnalyň täze sany çapdan çykdy
Golaýda Türkmenistanyň Bilim ministrliginiň “Bilim” ylmy-usuly žurnalynyň ýurdumyzyň hemişelik Bitaraplygynyň 30 ýyllyk sanly senesine bagyşlanan täze sany çap edildi. Makalalar “Türkmenistanyň hemişelik Bitaraplygynyň 30 ýyllygy: bilimiň täze gözýetimleri”, “Ylmy makalalar”, “Mekdebe çenli terbiýe”, “Umumybilim berýän mekdep”, “Ýokary bilim” diýen rubrikalarda berildi.
Žurnalyň ilkinji sahypalarynda hormatly Prezidentimiz Serdar Berdimuhamedowyň Türkmenistanyň hemişelik Bitaraplygy, onuň Ýer ýüzünde parahatçylygy we howpsuzlygy berkitmekde, hoşniýetli, dost-doganlyk gatnaşyklaryny giňeltmekde, asuda, abadan, durnukly ösüşi üpjün etmekde ýerine ýetirýän hyzmaty hakyndaky parasatly pikirleri ýerleşdirildi.
“Türkmenistanyň Bitaraplygy: milli kökleriň, pedagogik we pelsepewi garaýyşlaryň sazlaşygy”, “Türkmen Bitaraplygy: ynanyşmagyň we parahatçylygyň kepili” atly makalalarda türkmen Bitaraplygynyň Berkarar döwletiň täze eýýamynyň Galkynyşy döwründe döwletimiziň dünýädäki syýasy we ykdysady ornuny berkitmekdäki orny, ynanyşmak we dostluk ýörelgelerine esaslanýan içeri we daşary syýasaty, umumadamzat bähbitli halkara başlangyçlary we olary dünýä ýaýmakda alnyp barylýan işler giňden düşündirilýär. Halkara parahatçylyk we ynanyşmak ýylynda türkmen Bitaraplygynyň milli nusgasynyň dünýä giňişliginde uly rowaçlyklara beslenýändigi bellenilýär.
“Ylmy makalalar” atly rubrikada berlen makalalarda Bitaraplyk ýyllary içinde türkmen halkynyň Milli Lideri Gurbanguly Berdimuhamedowyň we hormatly Prezidentimiz Serdar Berdimuhamedowyň bimöçber aladalary bilen, ýurdumyzyň ylym, bilim, saglygy goraýyş we derman senagaty pudaklarynyň hemmetaraplaýyn ösüşi, düýpli kämilleşişi, tehnikanyň we tehnologiýanyň iň täze gazananlarynyň şu we beýleki ulgamlara ornaşdyrylyşy beýan edilýär. Milli bilim ulgamynyň dünýäniň bilim giňişligine goşulyşmak işinde hünärmenleri taýýarlamagyň döwrebap ugurlary we wezipeleri kesgitlenilip, munda bitaraplygyň ählumumy tagallalarynyň birleşdiriji kuwwatynyň barha artýanlygy nygtalýar. Gahryman Arkadagymyzyň oňyn Bitaraplyk jähetli parahatçylyk filosofiýasynyň güýjüniň we gymmatynyň parahatçylygyň döredijilik kategoriýasy hökmünde çuňňur mana we mazmuna eýe bolandygy bellenip geçilýär. Hormatly Prezidentimiziň parasatly baştutanlygynda Gahryman Arkadagymyzyň badalga beren beýik işleriniň üstünlikli dowam etdirilýändigi öz beýanyny tapýar.
Şeýle hem, bitaraplyk ýyllary içinde lukmançylyk biliminde we ylmynda ýetilen sepgitler, bu taryhy döwürde BMG-niň resmi dillerini öwretmek boýunça ýetilen sepgitler, Gahryman Arkadagymyzyň Bitaraplyk taglymatyny öwrenmegiň meselelerine bagyşlanan makalalara aýratyn orun berilýär.
Žurnalyň “Mekdebe çenli terbiýe” rubrikasynda “Çagada irki ösüş döwründe ynsanperwerlik gymmatlyklaryna söýgi döretmek”, “Körpelerde milli duýgulary kemala getirmek möhüm wezipedir” atly makalalar berlip, olarda geljegimiz bolan ýaş nesliň tebigy zehin-başarnyklaryny ösdürmek, okuwa höwesini artdyrmak, aýdyň durmuş ýoluna ugrukdyrmak babatda toplumlaýyn işleriň üstünlikli durmuşa geçirilýändigi, onuň milli terbiýeli bolmagy, asylly sypatlarynyň kemala getirilmegi üçin hormatly Prezidentimiz we Gahryman Arkadagymyz tarapyndan hemme şertleriň döredilendigi aýdylýar.
Žurnalymyzyň “Umumybilim berýän mekdep”, “Ýokary bilim” rubrikalarynda berlen makalalarda hem Türkmenistanyň hemişelik Bitaraplygy we onuň milli gymmatlygymyz hökmündäki aýratynlyklary baradaky garaýyşlar täze pikirler bilen dowam etdirilýär, oňyn Bitaraplygymyzyň milli nusgasynyň aýratynlyklary we ony umumybilim berýän mekdeplerde, ýokary okuw mekdeplerinde wagyz etmegiň ugurlary we aýratynlyklary teswirlenýär. Türkmenistanyň hemişelik Bitaraplygy baradaky bilimleri öwretmegiň häzirki zaman usulyýeti, ondaky öňegidişlikler beýan edilýär. Halkara parahatçylyk we ynanyşmak ýylynda Türkmenistanyň ýokary okuw mekdepleriniň halkara giňişliginde alyp barýan köptaraply gatnaşyklary açylyp görkezilýär.
“Bilim” ylmy-usuly žurnaly
