Bäsleşigiň gatnaşyjylary üçin gyzykly gezelençler guraldy
Ýurdumyzda ýaş nesil barada edilýän aladalar öz miwesini berýär. Soňky ýyllarda halkara ders bäsleşiklerinde, sport ýaryşlarynda baýrakly orunlara mynasyp bolýan talyp ýaşlaryň, mekdep okuwçylarynyň sany artýar. Şu ýylyň 24-nji maýynda Türkmenistanyň Daşary işler ministrliginiň Halkara gatnaşyklary institutynda geçirilýän «Halkara gatnaşyklary: parahatçylyk dialogynyň medeniýeti» atly halkara bäsleşiginiň maksatnamasynyň çäklerinde daşary ýurtly myhmanlar Türkmen halysynyň milli muzeýine we Türkmenistanyň medeniýet merkeziniň Döwlet muzeýine baryp gördüler we gezelenç etdiler. Gezelenje Azerbaýjan Respublikasynyň, Eýran Yslam Respublikasynyň, Hytaý Halk Respublikasynyň, Gazagystan Respublikasynyň, Gyrgyz Respublikasynyň, Täjigistan Respublikasynyň, Özbegistan Respublikasynyň, Türkiýe Respublikasynyň, Russiýa Federasiýasynyň ýokary okuw jaýlarynyň talyplary we olara ýolbaşçylyk edýän professor-mugallymlary gatnaşdylar. Myhmanlar Türkmen halysynyň milli muzeýine bardylar, türkmen halkynyň taryhyny wasp edýän nepis halylarymyzyň taryhy bilen tanyş boldylar. Myhmanlary türkmen gelin-gyzlarynyň nepislik bilen dokan Ginnesiň rekordlar kitabyna giren halylarymyz, ýüň we ýüpek halylarymyz,türkmeniň gara öýi, milli egin-eşikleri haýran galdyrdy. Myhmanlar muzeýde türkmen halysynyň dokalyşy bilen tanyşdylar. Gezelenje gatnaşyjylar ýurdumyzda ýaş nesilleriň ukyp-başarnyklaryny, zehin aýratynlyklaryny ýüze çykarmaga döredilýän giň mümkinçilikler üçin hormatly Prezidentimize minnetdarlyk bildirdiler.
«Ýaşlar barada döwlet syýasaty hakynda» Türkmenistanyň Kanunyna laýyklykda, ýaş nesliň hukuklaryny we azatlyklaryny üpjün etmek, döwletimiziň we jemgyýetimiziň syýasy, ykdysady, medeni durmuşyna ýaşlaryň doly hukukly gatnaşmagy üçin oňaýly şertler döredilýär. Munuň özi, jemgyýetiň bitewiligini, berkligini, agzybirligini we jebisligini aňladýar; döwletde amala aşyrylýan belent sepgitlere we özgertmelere ýetmek üçin milli maksatnamalary durmuşa geçirmekde ýaşlaryň ýakyndan gatnaşmagyna ýardam berýär.
Maksat ASTANOW,
Türkmenistanyň Daşary işler ministrliginiň
Halkara gatnaşyklary institutynyň talyby.
